2017年9月25日星期一

穴來穴對:俾人激親,條氣唔順,點算?(疏肝調和篇 - 支溝 & 陽陵泉)

條氣唔順,大多數都係俾人激親。中醫認為,一旦情志內傷,肝膽就會失於疏泄,導致氣機不暢,甚至氣鬱化火,可表現為兩脅插刀咁痛,胸悶腹脹,小便不利,大便不通等等。

教大家學下呢兩個穴位,以防俾小人激到紮紮跳~


支溝
又名飛虎。
同飛虎隊冇關架,不過係同手上嘅虎口有關就真。

點解叫飛虎?
由於呢個穴位有一個簡易取穴法:以雙手虎口作交叉,中指尖飛到對側前臂外側就是穴位的位置,所以又名飛虎。

點解叫支溝?
支,有肢的意思,指上肢前臂部位;
溝,因為呢個穴位在手腕後兩條骨之間的凹陷位,兩條手筋之間如溝,所以呢個穴位叫支溝。

支溝有幾好用?
支溝係經火穴,有清利三焦,降火通便的作用。尤其是你谷氣時,有冇試過身體好似塞晒車咁,眼睛赤痛,胸悶腹脹,小便不利,大便不通等症狀呢?

支溝可以清利三焦之氣 (三焦分為上焦、中焦、下焦,簡單黎講,三焦係身體內嘅運輸管道),條氣順晒,冇再塞車,好多身體毛病就會迎刃而解啦!



陽陵泉
又名陽陵、陽之陵泉

點解叫陽陵泉?
由於呢個穴位在小腿外側腓骨小頭前下方凹陷處,腿外側屬陽,腓骨小頭突起個位似一個山陵、陵丘,穴在其下方凹陷部,故稱泉,所以此穴叫陽陵泉。

睇實你肝膽脅肋經筋
陽陵泉係膽經合土穴,本經脈氣所入,又善於治療筋病 (例如跌打損傷,筋骨勞損等等),所以亦係筋之會穴。

另外,陽陵泉以疏調肝膽為主,意思係幫你疏疏肝,以免大動肝火,「辣著」你set肝膽,通常表現為口苦咽乾,頭暈眼花,脅肋疼痛,頭痛失眠等等。



支溝與陽陵泉,分別係手少陽三焦經穴及足少陽膽經穴,認住呢set少陽經穴,希望大家都有所得著啦~


支溝 & 陽陵泉

支溝
陽陵泉
位置
在前臂背側,腕背橫紋中點上3寸,尺骨與橈骨之間
在小腿外側,在腓骨頭前下方凹陷處
所屬經絡
三焦經
膽經
備註
經火穴,本經脈氣所行
合土穴,本經脈氣所入
筋之會穴
功效
調理臟腑,通關開竅,
活絡散瘀,行氣止痛,
清利三焦,通調腑氣,
降逆泄火
和解少陽,疏泄肝膽,
清瀉濕熱,袪除風邪,
舒筋活絡,緩急止痛
主治
兩穴合用有小柴胡湯之功,疏散鬱結,和解少陽,善治少陽病
膽囊炎,慢性肝炎,症見脅肋疼痛者
肋間神經痛
習慣性便秘
婦人月經前乳房脹痛,經行不暢等症

沒有留言:

發佈留言